Sabirabad müəllimlərinin bir də bu problemi var imiş..

Ötən ol avqust ayının 26 da Azərbaycan Həmkarlar İttifaqları Konfederasiyasının (AHİK) yeni sədri vəzifəsinə Sahib Məmmədov seçildi. Bundan sonra isə Konfederasiyada bir sıra nəzərə çarpacaq islahatlar başlandı. Bir sıra kadr islahatları həyata keçirildi. Sahib Məmmədov bundan sonra Konfederasiyanın şəffaf və hesabatlılıq prinsipləri ilə işləyəcəyini bəyan elədi. S.Məmmədov müvafiq olaraq şəffaflıqla bağlı regional idarələrə tapşırıqlarını verib. Eyni zamanda bu ilin avqust ayının 29-da Azərbaycan Təhsil İşçiləri Azad Həmkarlar İttifaqına yeni sədr seçilib. İttifaqın yeni sədri Araz Paşayev sədr seçilib. Eyni qaydada Araz Paşayev də yeni seçkidən sonra müvafiq olaraq yerli idarələrə şəffaflıqla bağlı tapşırılar verib. Bu barədə rəsmi xəbər agentliklərində informasiyalar yer alıb. Yeni sədr islahatlara başlasa da, müvafiq olaraq tapşırıqlar versə də, bu tapşırıqlar deyəsən Bakıdan 165 km uzaqda olan Sabirabad rayonuna gedib çatmayıb. Bununla bağlı cumhuriyyet.az bildirir ki, dövrü mətbuatda yayılan məlumatlara görə, Sabirabad Rayon Təhsil İşçiləri Həmkarlar İttifaqından isə narazılıqlar son bir neçə ayda xeyli artıb. Məlumata əsasən Sabirabad Rayon Təhsil İşçiləri Həmkarlar İttifaqının sədri Seyidhüseyn Hüseynov rayon üzrə 4 min nəfərdən ibarət olan pedaqoji kollektivdən hər ay topladığı vəsaitlərlə bağlı hesabat vermir. Narazı müəllimlər deyir ki, S.Hüseynov özü dəbdəbəli həyyat yaşayır. Dəyəri 60 min manatdan baha olan ən son model “Toyota Camry” avtomobili idarə edir.
Müəllimlər qeyd edirlər ki, hər ay Sabirabad rayonunda 4 min müəllimin əmək haqqından 2 faiz Həmkarlar İttifaqına üzvlük haqqı tutulur. Bu isə ortalama adambaşına 20 manat deməkdir. Əgər hər müəllimdən ayda ortalama 20 manat üzvlük haqqı toplanırsa, 4 min müəllimdən toplanan vəsait 80 min manat edər və Sabirabadın təhsil kollektivləri haqlı olaraq sual edirlər ki, bu vəsait hara yoxa çıxır? Yayılan məlumatlara əsasən cumhuriyyet.az bildirir ki, S.Hüseynova müraciət edən müəllimlərə cavab verilir ki, toplanan vəsaitlərin 50 faizi avtomatik olaraq Bakıya, Azərbaycan Həmkarlar İttifaqları Konfederasiyasının hesabına köçürülür. Yerdə qalan 10 faiz yardım və putyovkaların verilməsinə xərclənir, əsas 40 faizi isə guya Sabirabadda keçirilən tədbirlərə xərclənir. Maraqlıdır ki, toplanan vəsaitlırin 50 faizi Sabirabadda qalsa da keçirilən tədbirlər, onların təşkili ilə bağlı sərf edilən vəsaitlər haqqında məlumat almaq mümkün olmayıb.
Qeyd edək ki, məsələ ilə bağlı Mil-Muğan Regional Təhsil İdarəsinə sorğu göndərilsə də, sorğuya cavab verilməyib. Azərbaycan Təhsil İşçiləri Həmkarlar İttifaqınının (ATİAHİ) Sabirabad rayon Komitəsinin saytında da yığılan üzvlük haqqları, bu vəsaitlərin sərfiyyatı ilə bağlı heç bir məlumat tapa bilmədik. Ümumiyyətlə https://sabirabad.atiahi.org/pages/sabirabad-umumi-melumat elektron ünvanda fəaliyyət göstərən saytın demək oalr ki, bütün bölmələri böşdur.

Cumhuriyyet.az